Garlic is as Good as Ten Mothers

 

الحوار بدأ بالكلام عن التوم والطبيخ وازاي الحاجات مبقاش لها طعم وانك محتاج تحط راس توم كاملة عشان تحس بطعم التوم في الاكل وخلص بالكلام عن ليس بلانك وهيرزوج والافلام والجد والهزار، شوفوا الفيلم : )

Goodnight Mommy (2015)

555

في أحد مراحل حياتي، كنت بقفل أي فيلم قبل ما يخلص بعشر دقايق. بشكل غير متعمد، بكون زهقت، أو خدت الجرعة السينمائية اللي عاوزاها وخلاص، بفقد اهتمامي بتقفيلة الفيلم. فيلم Goodnight mommy ، كان هيبقى أحلى بكتير في دماغي لو كنت مشيت من القاعة قبل آخر عشر دقايق.

اللطيف فُرجتي قريب على فيلم let the right one in . بالنسبة لواحدة عمرها ما شافت أفلام رعب بسبب الزهق واللعب على استثارة مشاعر سطحية، الفيلمين دول وروني لعب مختلف على تيمة كانت شبعت استهلاكية. فكرتّ إن هيبقى صايع في مجتمع عنده مامي ايشوز إن حد يمصر الفيلم ده.

*الصورة لسالي مان المصورة الأمريكية اللي أثارت جدل واسع بتصويرها لأطفالها بشكل غير معتاد تلقيه من الذائقة المجتمعية.

أوديسا عراقية 2014

iraqi_odyssey_still

امبارح كنت بتكلم مع أخويا الصغير إني مستاءة من الاستهلاك اللحظي للأحداث اللي خلقه استخدام السوشيال ميديا كمنصة رئيسية اضطرارية ووحيدة_ بسبب التضييق الأمني الكبير_ للنقاش المجتمعي. النهاردة رحت فيلم الأوديسا العراقية في مهرجان القاهرة للمخرج العراقي / السويسري سيف جمال الدين.

الفيلم مش بس إضاءة أفقية واسعة على التاريخ العراقي من الحرب العالمية الاولى لدلوقتي من خلال تتبع حياة ومصائر  عائلة المخرج اللي كانت بأجيالها المتتابعة قريبة من الحراك السياسي في العراق تحديداً مع الحركة الشيوعية واللي المخرج بيجري ورا أفرادها عشان يصور معاهم ما بين لندن ونيوزلندا وأمريكا وسويسرا وروسيا وألمانيا والعراق ولبنان، لكن كمان بيحتوي على لقطات أرشيفية نادرة وتوظيف ممتاز للقطات دي.

نبرة الفيلم لا دعائية فجة ولا وثائقية من بتوع الجزيرة، نبرة معلوماتية فنية شخصية وناضجة، بتحترم الجمهور اللي بيتفرج على الفيلم.