متعة نادرة

بقى نادر جدًا إني أتفرج على فيلم، من غير ما ابقى عارف عنه أي حاجة، وأي حاجة معناها إني مشوفتش التريلر، معرفش الجنرا، معنديش فكرة عن مدته، متاخد من رواية ولا سيناريو أصلي، معرفش المخرج..وهكذا

المعلومة الوحيدة اللي كنت عارفها قبل ما اشوف فيلم Room، هي سنة الفيلم واسم الممثلة، بري لارسن، اللي عملت قبل كده فيلم

Short film 12

المعرفة بالسياق بقى شيء لا مفرّ منه، ومش بحاول أستخلص إن ده كويس أو وحش، لكن كل ما بيتكرر من وقت للتاني إني أتفرج على حاجة من غير سياق تماماً، ويكون فيلم حلو بطبيعة الحال، ببقى مفتون، وبتفاجئ أد إيه أنا سايب نفسي أتماهى مع الفيلم، عشان ذهني فاضي، ومتقبل الرحلة، ومعنديش توقع

النهاردة وانا بتفرج في حتة من الفيلم، قلبي دقّ ومعدّل ضرباته زاد، لدرجة إني تقريبًا كنت سامعه…أنا عارف إن إحاطة الأفلام بالسرية التامة حاجة شبه مستحيلة، بس لعبة صغيرة زي دي، خلتني أفكر أد إيه مهم المعلومات اللي الواحد بيعرفها قبل الفيلم وحواليه، وأد إيه مهم اللي بيعمل الفيلم يفكر في السياق اللي هو عايز يحيط الفيلم بيه، أو الغموض اللي عايز يحافظ عليه…مش عارف..حاسس إن الجهل المطلق ده مبقاش سهل خالص، يمكن كان سهل في التليفزيون زمان وقبل الانترنت وكده، لكن يظل حاجة مهمة، إنك تبقى بتتفرج على الفيلم ومش عارف هو ساعة ونص ولا ساعتين، ولا تبقى عارف فات منه أد إيه، وغيرها من المعلومات اللي بتخلق سياق غصب عني بيتدخل في المشاهدة وبيقلل من قابليتي للانقياد

يعني..يمكن كلام مش مرتب شويتين، لكني منفعل بالمشاهدة والفيلم جدًا

Slow West (2015)

بتحمس لأي فيلم ويسترن، النوع نفسه مفضل، وقواعده المعروفة مسبقًا بتخلي الدخول لعالم الفيلم سهل نسبيًا، نفس سهولة مشاهدة حلقة من سيت كوم أنتَ عارفه وعارف شخصياته، فبيسهّل عليك المشاهدة من أول ثانية

يمكن أكتر حاجة جذبتني للفيلم هو اسم البطل، فاسبيندر، ممثل غزير الإنتاج واختياراته دايمًا على الأقل فيها شيء يستحق المشاهدة، وبما إن ده أول فيلم للمخرج، فمكنش عندي أي توقعات عن الفيلم

الفيلم معمول حلو، كما يليق بفيلم أمريكي فيه بطل بحجم فاسبيندر، مفيش جديد، يمكن من ناحية الصورة بالذات كان معمول بإتقان زايد عن اللزوم، ساعات المبالغة في تقفيل الفريم بتطردني برة الفيلم، يعني الكادر بالغ الجمال والتنسيق، وتكوين ما يخرش المية، لكنه من كتر تقفيله ملفت للانتباه

ما اقدرش أقول إني شوفت الفيلم بتركيز كامل، خاصةً إني بعيد نسبيًا عن فورمة المشاهدة، لكن من بداية الفيلم فيه محاولة بالعافية إنه يقدم فيلم ويسترن “مختلف”،  وده ضرّ الفيلم جدًا، في رأيي، الفلاش باك غير موفق، المونتاج اللي بيربط الفلاش باك بالحدث الجاري مش مفهوم بالنسبالي كان مبني على إيه، زائد محاولة إنه يحط خط ميتافيزيقي في الفيلم (زي مشهد جاي لما بيروح يتبول وبيقابل ناس غرب، ويصحى يلاقي نفسه في مكان تاني، أو الكاتب اللي بيقابله في الطريق وبيقعد معاه شوية وبعدين يصحى يلاقي نفسه وحيد وسط الصحرا)، وتون الحديث عن المواطنين الأصليين لأمريكا والإبادة اللي اتعرضولها (كحدث موجود في خلفية القصة الأساسية) كان تون عالي جدًا، خاصةً إنه مش بيقول حاجة جديدة

معروف إن الغرب الشرس اللي بيظهر في الأفلام، الناس ممكن تموت فيه لأتفه سبب، مفيش داعي لتأسيس المعلومة دي من أول وجديد كأننا مشوفناش أفلام ويسترن قبل كده، عشان كده حسيت إن الفيلم مرتبك بين هوية الويسترن القديم ومحاولة خلق هوية جديدة من خلال تفاصيل في الإخراج وتأطير “تشكيلي” أكتر من اللازم وخط ميتافيزيقي

حنيت لفيلم “لا يغتفر”1، وتذكرت أد إيه كان فيلم مجدد بالنسبة  أفلام الويسترن، احتفظ بالتقاليد، وفي نفس الوقت كان التجديد في الفيلم تقيل وحقيقي عشان مبني على الحدوتة نفسها والمعالجة، وإخراج شعري/رومانسي/عاطفي مناسب للموضوع، في نفس الوقت اللي عرف يحتفظ فيه بعنف الغرب، وعشوائية القتل والموت فيه، كتيمة مش محتجة تأسيس باعتبارها شيء معروف بالضرورة

يظل الفيلم –بقصته الأساسية البسيطة- فيلم معقول، الشخصيات كانت محتاجة تفاصيل أكتر، والتحول الدرامي  الأساسي لشخصية فاسبيندر كان غامض شوية، كان ممكن الفيلم يبقى تقليدي وكويس من غير التجويد اللي فيه، ويركز على الحاجات الأساسية زي علاقة الشخصيات ببعضها وتاريخها اللي بتنطلق منه لاتخاذ قرارات جوه الفيلم كانت مش مفهومة أوي بالنسبة لي…ولو كان الفيلم تقليدي تمامًا كان ممكن ساعتها اقول برضه “مجرد فيلم ويسترن تقليدي معمول حلو”..عشان كده ميال لمشاهدة الفيلم مرة تانية، ومتقبل جدًا إن حد ياخدني من إيدي ويقولي رأيه ويقنعني أشوفه تاني بطريقة مختلفة وأتصالح مع جزء من مشاكله معايا..بس رأيي بعد المشاهدة الأولى، إنه فيلم مراهق فنيًا، ومفيهوش أبعاد أتقل من ظاهره، حتى لو حاول يرمي أبعاد تانية، سواء ميتافيزيقية أو أبعاد متعلقة بذنب الرجل الأبيض تجاه المواطن الأصلي لأمريكا

Slow West (2015) BDRip x264 [TruthJunkie].mkv_snapshot_01.05.57_[2015.12.04_02.27.10]Slow West (2015) BDRip x264 [TruthJunkie].mkv_snapshot_00.36.55_[2015.12.04_02.23.46]Slow West (2015) BDRip x264 [TruthJunkie].mkv_snapshot_01.09.59_[2015.12.04_02.28.13]

1-Unforgiven (1992)

المدونة

قررنا دلوقت حالا وبعد سنة ونص من ورشة النقد السينمائي وبرمجة الأفلام (كراسات السيماتيك) نطلق مدونة، قبل المجلة، مجلة ٩.٥مم، نقول فيها اللي بنقوله لنفسنا ولبعض ونكمل اللي بنعمله. أهلا يا عالم.