الفراغ الأثيري

أنطونيوني هو المخرج اللي بيثير عندي شعور إني عاوزة أتمشى معاه في الحديقة كل يوم الساعة سبعة الصبح قبل الناس ما يصحوا ويكون بيننا أحاديث رخوة وهادئة تسترسل في اللانهائية.
بيرجمان هو المخرج اللي بصوت عالي بشتمه وأنا بتفرج على أي فيلم له: ينعل ميتين أمك. عشان بيزنقني أنا ووساخات النفس البشرية في ركن ضلمة مع بعض.
ايريك رومير هو المخرج اللي ببقى عاوزة أكلمه في التليفون بالليل ، عشان احنا اصحاب بس هو مسافر، فبحكي له اللي حصل في اليوم
جودار هو المخرج اللي كنت أحب أقابله في سنة تانية جامعة ونزوغ من المحاضرات ونحط أوزو في قزايز مية ونحضر نشاطات جامعية فنية ونسف عليها
دولان هو المخرج اللي عاوزة أروح معاه بارتي  ونرقص  سوينج ونتكلم على الناس كأصدقاء قدام جايين يضيعوا وقت
ديفيد لينش هو المخرج اللي عاوزة أتبادل معاه الكتابات السرية المظلمة

نواه بومباك هو المخرج اللي عاوز أقعد معاه نشوف أفلام ونتكلم عنها ونقول نظرياتنا وآراءنا

كوراساوا هو المخرج اللي أحب أبقى مساعد ليه في الحاجات اللي ملهاش علاقة بالسينما، مدبر منزل مثلاً، زي ألفريد وباتمان كده

تاركوفسكي هو المخرج اللي ممكن أسافر معاه في روود-تريبّ طويل من غير ما نتكلم، ممكن نسمع مزيكا في العربية

سبايك لي هو المخرج اللي أحب أحضر له ورشة سينما

لينكلاتر طبعًا أحب أرغي معاه كتير جدًا جدًا عن الأفلام وعن كل حاجة تانية، ولو كنا أصغركنت أحب أنشط معاه في قضية بيئية أو سياسية مشتركة

 

سلسلة الحياة البرية الفلسطينية/ فيلم قصير 2016

FB_IMG_1454847164154

بغض النظر عن الاستعراض اللغوي الطويل ، أنا شايفة إنه كفيلم مفتعل ، مش بطال.
الفيلم متصور من شاشة جهاز التلفزيون، الكاميرا بتصور التلفزيون وهو بيعرض برنامج عن عالم الحيوان، فالماتيريال مثلاً طالعة بانعكاس لمبة النيون اللي في الأوضة على الشاشة. بينطلق الفيلم من حدوتة شخصية حصلت لصديقة المخرجة لما المستوطنين الإسرائيلين هاجموا بيتهم بحجة إنه ملكهم، وازاي ده خلاهم عايشين في رعب لعدة أسابيع من تكرار الهجوم.
الفيلم فيه سخرية مبطنة من فكرة المسرحية اللي الفلسطينين عايشين فيها وبيضطروا للتماهي معاها، وإن ازاي ده بيحول فقرات حياتهم لحياة برية بدائية. فكرة المسرحية منعكسة في المسافة اللي متاخدة من الحدث بالكاميرا اللي بتصور التلفزيون ثم بلعب المخرجة في الماتيريال بشوية حركات.

بصور انعكاس وشي على شاشة اللاب توب وفيلم شغال /
بصور نفسي وأنا باخد صورة لنفسي في المراية/
باخد صورة لنفسي و الإضاءة ضاربة في وشي فمايبنش/
بصور نفسي في انعكاس قزاز الشباك فيتداخل انعكاسي المشوش مع الباك جراوند اللي ممكن تكون الشارع،
بعمل فلتر للصورة ينعمها ويفصلها عن أصلها وأنزلها بهاش تاج فيه كلمات عامة وواسعة.